Европските регулатори бараат втори засилени (бустер) дози на вакцини за Ковид-19 за лицата постари од 60 години, во моменти кога случаите и хоспитализациите повторно нагло се зголемуваат.
Препораките од Европскиот центар за превенција и контрола на болести (ECDC) и Европската агенција за лекови (EMA), исто така, вклучуваат луѓе со медицински состојби кои ги ставаат во висок ризик од тешка болест, се вели во соопштението на двете агенции објавено денеска. Неделните стапки на случаи кај луѓето на возраст од 65 години и постари се зголемија за 32 отсто во 22 од пријавени 24 земји, во неделата што заврши на 3 јули, во споредба со претходната седмица, се вели во соопштението на ECDC.
Новата препорака следи по упатството издадено во април, кое бараше лицата постари од 80 години да се земат предвид за втора бустер доза. Новите mRNA вакцини може да се аплициараат најмалку четири месеци по претходната. Агенцијата посочи дека, во моментот, нема јасен доказ за поддршка за давање втор засилувач на луѓе под 60 години кои не се изложени на поголем ризик од тешка болест.
„Со оглед на тоа што случаите и хоспитализациите повторно се зголемуваат како што влегуваме во летниот период, ги повикувам сите да се вакцинираат и да се засилат што е можно побрзо“, рече во изјавата Стела Киријакидес, комесар за здравство на ЕУ. „Ги повикувам земјите-членки веднаш да воведат втори засилувачи за сите постари од 60 години, како и за сите ранливи лица“, додаде таа.
Во меѓувреме, променливиот коронавирус создаде уште еден суперзаразен омикронски мутант кој ги загрижува научниците додека зајакнува во Индија и се појавува во многу други земји, вклучително и САД.
Научниците велат дека варијантата, наречена BA.2.75, може брзо да се шири и да го заобиколи имунитетот од вакцините и претходна инфекција. Не е јасно дали може да предизвика посериозна болест од другите варијанти на омикрон, вклучително и глобално истакнатата BА.5.
„Сè уште е навистина рано да извлечеме заклучоци“, вели Метју Биникер, директор за клиничка вирологија во клиниката Mayo во Рочестер, Минесота. „Но, изгледа дека, особено во Индија, стапките на пренос покажуваат таков експоненцијален пораст. Дали ќе го надмине BA.5, останува да се види“, рече тој.
Сепак, фактот дека веќе е откриен во многу делови од светот, дури и со пониски нивоа нанадзор е ран показател дека се шири, посочува Шиши Луо, шеф на одделот за заразни болести на Helix, компанија која обезбедува информации за секвенционирање на вируси до Центрите за контрола и превенција на болести во САД.
.webp){kind=icon}
