Цената на железната руда паѓа – се очекува уште поголем пад

Цената на железната руда падна на најниско ниво од септември поради сезонско намалување на побарувачката и сигналите дека кинеските челичарници го ограничуваат производството

Фјучерсите паднаа четврти ден по ред во Сингапур, достигнувајќи под 93 долари за тон. Врнежливата сезона на југот на Кина, заедно со високите температури на северот, доведоа до забавено темпо на градежни активности, соопшти „Шангај метал маркетс“.

Во понеделникот, податоците од Кина – најголемиот увозник на железна руда – покажаа дека дневното производство на челик во мај е пониско од април и за речиси 7 отсто помало отколку во истиот месец лани. Тоа е најслаб резултат за мај од 2018 година.

Bloomberg

Цената на ова основно средство за производство на челик е под притисок последниве недели, бидејќи трговците очекуваат поумерено темпо на градба во летните месеци, како и зголемени напори од кинеските власти да го намалат производството на челик и да спречат вишок. Фјучерсите штотуку завршија четврта последователна недела со загуби – најдолг негативен тренд од јануари наваму.

„Побарувачката за челик во Кина веројатно ќе остане слаба во наредните месеци поради сезонскиот застој“, се вели во белешка на „Сити груп“, која ги намали прогнозите за цената на железната руда. Тие додаваат дека пазарот со недвижности во Кина сè уште не покажува знаци на закрепнување, а индустриското производство се соочува со сè поголеми трговски притисоци.

Банката ја намали краткорочната (тримесечна) прогноза на 90 долари за тон, од претходните 100 долари, а прогнозата за шест до дванаесет месеци ја намали од 90 на 85 долари.

На страна на понудата, рударските компании во Бразил – вториот најголем извозник по Австралија – го зголемија извозот. Во мај биле извезени 35,077 милиони тони, што претставува рекорд за тој месец.

Фјучерсите на железна руда паднаа до 1,2 отсто на 92,90 долари за тон во Сингапур, пред да се стабилизираат на 93 долари во 11:44 часот. Фјучерсите на челик во Кина исто така забележаа пад.

Цените на бакарот и другите индустриски метали се намалија, бидејќи инвеститорите ја следат состојбата со конфликтот меѓу Израел и Иран. Претседателот на САД, Доналд Трамп, повика на евакуација на Техеран, со изјава што се косеше со претходниот оптимизам дека ситуацијата нема да ескалира во поширок конфликт.

Цената на бакарот се намали за 0,3 отсто на 9.674,50 долари за тон на Лондонската берза за метали, додека алуминиумот падна за 0,2 отсто на 2.508,50 долари.

Во моментов нема коментари за веста. Биди прв да коментира...

Остави коментар