Кина воведе берзанско тргување со полисилициум

На денешното берзанско тргување во Кина дебитира првиот фјучерс за полисилициум. Новата хеџинг-алатка на пазарот се воведува во услови кога оваа суровина се соочува со нестабилност на цените бидејќи производителите најавија дека ќе го намалат производството.

На првиот ден од неговото тргување на фјучерс берзата во Гуангжу полисилициумот достигна цена од 5.800 евра за тон (44.000 кинески јуани), а се истргуваа вкупно 331.253 лота, од кои над 90 проценти се склучени договори за јуни идната година.

Цената на полисилициумот периодов е на историски најниско ниво Bloomberg Mercury

Берзата нуди седум договори за испорака, почнувајќи од јуни. Маржата изнесува девет отсто од вредноста на договорот. Цените ќе може да пораснат или да паднат за седум проценти во однос на претходното тргување, откако на првиот ден беше дозволен опсег до 14 отсто.

Кина е најголемиот светски производител на полисилициум, кој се користи во соларни панели, а индустријата се бори со огромен суфицит поради што доживеа пад на цените за речиси 90 проценти во последните две години. Како и другите делови од синџирот на снабдување во индустријата за соларна енергија, изградени се премногу капацитети во однос на побарувачката, што ја намалува профитабилноста. Производителите на полисилициум одговорија со намалување на производството.

Кина се обложува на чиста технологија за да го поттикне економскиот раст, а берзата во Гуангжу постигна успех тргувајќи со други „зелени“ материјали, како што е литиумот, кој се користи во батериите на електричните возила.

Во моментов нема коментари за веста. Биди прв да коментира...

Остави коментар