Стапката на инфлација сè уште е над нашиот историски просек, што е главната причина зошто Народната банка на последниот состанок одлучи да ја остави непроменета основната камата. Гувернерката Анита Ангеловска-Бежоска во ексклузивна изјава за македонската редакција на телевизијата „Блумберг Адрија“ открива од што ќе зависат идните потези на централната банка. Комитетот за оперативна и монетарна политика донесе одлука за непроменетост на монетарната поставеност, што подразбира задржување на основната камата од 6,3 проценти, третпат по ред, но на непроменето ниво ги остави и каматните стапки на депозитите прекуноќ и на седумдневните депозити.
„Генерално, секогаш, при носењето на одлуките се водиме од последните макроекономски и финансиски податоци со најголем фокус на монетарната стратегија кај нас, на движењата во сегментот на инфлацијата и на девизниот пазар. Сега за сега движењата на инфлацијата се во насока со нашите очекувања, малку подобри, што е добро. Исто така и во девизниот сегмент, минатата година ја завршивме со повисоко ниво на девизни резерви од нашите очекувања и октомвриските проекции, а тие стабилни трендови продолжуваат и оваа година“, вели Ангеловска-Бежоска.
Таа сепак потврдува дека неизвесноста е присутна и најголемите ризици се поврзани со инфлацијата. Во земјава напролет се одржуваат и двојни избори, што може да биде фактор плус за зголемувања на стапката на инфлација. Секако, има и надворешни фактори што може да притискаат.
Гувернерката вели дека се следат и потезите на Европската централна банка (ЕЦБ), која во три наврати ја остави непроменета основната камата, но продолжи со апсорпција на ликвидност.
Очекувањата на финансиските пазари се дека ЕЦБ првото намалување ќе го направи некаде околу април, но тогаш стапката би се намалила само за 25 базични поени, додека годинава вкупното намалување би требало да биде 140 базични поени. Сепак, аналитичарите очекуваат побавна реакција.
Нашите анализи покажуваат промена на трендот во земјава кон крајот на вториот квартал годинава.
Инфлацијата во декември 2023 година во Македонија беше 3,6 отсто на годишно ниво, при значително намален притисок од цените на храната и енергијата, но и пониски ценовни притисоци од помалку променливите категории, во согласност и со преземените монетарни мерки.
Поопширно од гувернерката утре на „Блумберг Адрија“ ТВ.
Ажурирано со две видеа од изјавата на гувернерката
.webp){kind=icon}
